د پوهنې وزارت د ښوونې او روزنې محترم معین له یو شمېر مرکزي ریاستونو څخه لیدنه وکړه

د پوهنې وزارت د ښوونې او روزنې معین محترم شیخ عبدالمالک حقاني، د ښوونکو د روزنې او مسلکي پراختیا، ښوونیز نصاب او ساینس مرکز ریاستونو څخه لیدنه وکړه او د یادو ریاستونو له مسئولینو او رهبرۍ سره یې له نږدې وکتل.
نوموړي د لیدنو پر مهال د خپلو خبرو په ترڅ کې وویل: زموږ هڅې باید یوازې تر ادارو پورې منحصرې نه وي، بلکې ټول باید هره ورځ تعلیمي مرکزونو ته لاړ شو، د هغوی ستونزې ژر تر ژره حل او د تدریس پروسه کې د پام وړ ښه‌والی راولو. 
دغه راز د پوهنې وزارت محترم معین د ساینس مرکز له هغو ځانګړو ټولګیو څخه هم لیدنه وکړه،کوم چې د یاد ریاست اړوند علمي غړو وړتیا لوړولو لپاره چمتو شوي دي.
د یادونې وړ ده چې د دغه سفر اساسي موخه، د ادارو ترمنځ د خپل منځي ملاتړ لازیاتوالی، همغږۍ پیاوړي کول، د فعالیتونو ښه والی او تر خپل اثر لاندې ادارو سره پېژندګلوي او بلدتیا ده. 
بل پلو د پورته ذکرشو ریاستونو چارواکو او منسوبینو د پوهنې وزارت له پلاوي څخه قدرداني څرګنده او هغوی ته یې له خپل لوري د کلک ملاتړ ژمنه تازه کړه.