هرات کې د ښوونځیو مدیرانو او ښوونکو لپاره د وړتیا لوړولو سیمینار جوړ شو
د "زده کوونکو ارواپوهنه" په محوریت د وړتیا لوړولو یو ورځنی سیمینار، د هرات ولایت د ۵۰ بابه ښوونځیو د ۱۰۰ تنو مدیرانو او ښوونکو په ګډون ترسره شو.
په دغه پروګرام کې، د یاد ولایت پوهنې رئیس محترم مولوي رحمت الله جابر، د دې سیمینار په ترسره کولو کې د ملاتړو ادارو له همکارۍ ستاینه وکړه، د زده کوونکو د رواني، فکري او چلندي ودې په برخه کې یې د ښوونکو په بنسټیز رول ټینګار وکړ.
نوموړي وویل، ښوونکي نه یوازې زده کوونکو ته د پوهې لېږدولو مسئولیت لري؛ بلکې د هغوی په فکري ځواک او شخصیت جوړونه کې هم ژوره اغېزه لري.
دیادونې وړ ده چې دغه پروګرام د پوهنې ریاست او د هرات ښار د یو روغتون د ارواپوهانو د یوې ډلې په همکارۍ ترسره شو.
