د تګاب ولسوالۍ پوهنې آمریت د ودانۍ بنسټ ډبره کېښودل شوه
د کاپیسا ولایت تګاب ولسوالۍ پوهنې آمریت د نوې اداري ودانۍ بنسټ ډبره، د یوې غونډې په ترڅ کې د خلکو په مالي مرسته د ۱.۵ مېلیونه افغانیو په لګښت کېښودل شوه.
ویناوالو دا نوښت د پوهنې د پیاوړتیا او د دغې ولسوالۍ پوهنې منسوبینو لپاره د اړینو کاري اسانتیاوو رامنځته کولو په برخه کې یو مهم ګام وباله او د پوهنې د ملاتړ په برخه کې یې د خلکو له همکارۍ ستاینه وکړه.
د یادې ولسوالۍ پوهنې چارواکو وویل: دغه ودانۍ چې۶ اداري خونې، غونډو تالار، پخلنځی او نور اړین ملحقات به ولري، په دوو پوړونو کې په اساسي ډول جوړېږي.
