د کابل ښار د ښوونځیو آمرینو سره د پوهنې وزارت د رهبري غونډه
د پوهنې وزارت د ښوونیز وضعیت د لا ښه والي په موخه، نن د کابل ښار پوهنې ریاست اړوند د یو شمېر ښوونځیو له آمرینو سره د پوهنې وزارت د وزیر الحاج مولوي حبیب الله آغا، مالي او اداري معین الحاج مولوي صبغت الله وصیل، د ښوونې او روزنې مخکني معین الحاج مولوي سخاءالله سعید، د کیفیت تضمین معین الحاج مولوي عبدالخالق صادق او د کابل ښار پوهنې رئیس مولوي جنت ګل عزیزي په ګډون غونډه ترسره شوه.
غونډه د مالي او اداري معین الحاج مولوي صبغت الله وصیل په وینا پیل شوه. نوموړي د ګډونوالو هرکلی وکړ او د غونډې اجنډا یې ورسره شریکه کړه.
ورپسې د پوهنې وزارت وزیر الحاج مولوي حبیب الله آغا د ښوونځیو آمرینو ته د ښوونې او روزنې د کیفیت لوړولو پر اهمیت ټینګار وکړ او زیاته یې کړه: "زموږ د هېواد پرمختګ د عصري علومو له لارې امکان لري، نو له همدې امله باید زدهکوونکي د دیني علومو تر څنګ په عصري علومو کې هم ښه وروزو." نوموړي له آمرینو وغوښتل چې ښوونکو ته د زده کړو روحيه ورکړي، هغوی مکلف کړي چې د زدهکوونکو ورځنۍ ارزونه وکړي او له هغوی پوښتنې ترسره کړي.
د ښوونې او روزنې مخکني معین الحاج مولوي سخاءالله سعید په خپلو خبرو کې وویل: "موږ زدهکوونکي تاسې ته سپارلي دي؛ هغوی داسې وروزئ لکه څنګه چې خپل اولادونه روزئ. دغه زدهکوونکي د هېواد راتلونکي معماران دي، باید له اوسه یې په ښو زده کړو وروزو."
د کیفیت تضمین معین الحاج مولوي عبدالخالق صادق هم په خپلو خبرو کې د عصري علومو د ودې او پرمختګ لپاره د اسلامي امارت د مشرتابه او د پوهنې وزارت د رهبري د بشپړې ژمنې یادونه وکړه او آمرینو ته یې وویل: "هر آمر باید په خپل کار کې متعهد واوسي، ځکه که متعهد نه واوسو د الله تعالی په وړاندې به مسئول یو. د زدهکوونکو د زده کړو کیفیت لوړ کړئ او د پوهنې وزارت لایحې په بشپړه توګه عملي کړئ."
د غونډې په پای کې د کابل ښار د ښوونځیو آمرینو خپل پرمختګونه او ستونزې د پوهنې وزارت له رهبري سره شریکې کړې او ژمنه وشوه چې د یادو ستونزو د حل لپاره به اړین ګامونه پورته شي.
غونډه د دعائیې په ویلو سره پای ته ورسېده.
