لوګر ولایت کې د ۳۰۰ زره ډالرو په لګښت د یو باب ښوونځي ودانۍ ورغول شوه
د لوګر ولایت مرکز پل علم ښار د کډوالو په کمپ کې د صلاح الدین ایوبي لومړني ښوونځي نوې ودانۍ د ۳۰۰ زره ډالرو په لګښت جوړه او د پوهنې چارواکو، یو شمېر دیني علماءکرامو او ځایي خلکو د استازو په حضور کې په رسمي ډول د زدهکوونکو پر مخ پرانیستل شوه.
یاده ودانۍ چې د یو جرېب ځمکې په ساحه کې جوړه شوې، ۱۶ درسي ټولګي، ۵ اداري خونې، یو لابراتوار، کمپیوټر خونه، لمریزې برېښنا او اوبو رسولو سیسټمونه، زرغون چاپېریال، لوبغالی او ځینې نور اړین ملحقات لري، چې لګښت یې د یوې تعلیمي مرستندویه ادارې لخوا ورکړل شوی دی.
د یادونې وړ ده، دغه ښوونځی دوه کاله مخکې د پوهنې وزارت له لوري د راستنېدونکو ماشومانو د زدهکړې په موخه تاسیس شوی و چې اوسمهال پکې شاوخوا ۷۰۰ تنه زدهکوونکي زده کړې کوي.
