د پکتیا ولایت پوهنې ریاست کارکوونکو لپاره مسلکي سیمینار جوړ شو
دپکتیا ولایت پوهنې ریاست، د ا.ا.ا. د چارو ادارې لوی ریاست د اداري اصلاحاتو او ملکي خدمتونو ریاست په همکارۍ، د تعلیمي ادارو د اداري چارو د اصلاح او آسانتیا په موخه، د ساده شويو اداري پروسو په اړه یو معلوماتي سیمینار ترسره کړ.
د یاد سیمینار د پرانیستې مراسمو کې د پکتیا ولایت پوهنې رئیس محترم مولوي عبدالقیوم فاروقي، د اداري اصلاحاتو او ملکي خدماتو د پروسو ساده کولو رئیس محترم مولوي بریالي ابدالي او د تعلیمي ادارو یو شمېر نورو منسوبینو ګډون درلود.
د پکتیا ولایت پوهنې رئیس په خپله پرانیستونکې وینا کې مېلمنو او ګډونوالو ته د ښه راغلاست پرمهال، د چارو ادارې لوی ریاست له کړنو ستاینه وکړه او تینګار یې وکړ چې روڼتیا، آسانتیا او اغېزمن کاري چاپېریال رامنځته کول د یوې ادارې له بنسټیزو اصولو څخه دي.
د اداري اصلاحاتو او ملکي خدمتونو د ساده کولو پروسې رئیس د همدغه سیمینار موخې او نور مهم اړخونه تشرېح کړل او د یو شمېر ساده شویو پروسو په اړه یې اړین معلومات وړاندې او ویې ویل: پلان لرو چې دغه ډول پروګرامونه د هېواد په ټولو ادارې کې پلي کړو، چې تر تطبیق وروسته به یې قوي څارنه ترسره شي او له ټولو ګډونوالو یې وغوښتل چې د سیمینار له منځپانګې څخه اعظمي ګټه پورته کړي.
د یادونې وړ ده چې د دغه سیمینار په ترڅ کې به د اداري اصلاحاتو اساسات، د پروسو ساده کول، د اسنادو سیسټماتیک مدیریت، د مراجعینو لپاره خدمتونو وړاندې کولو او اداري شفافیت په څېر موضوعات تر پوښښ لاندې ونیول شي.
