د لوګر ولایت اوسېدونکو د روان کال په لومړیو ۳ میاشتو کې له پوهنې سره ۵ مېلیونه افغانۍ مرسته کړې
د لوګر ولایت پوهنې ریاست ویلي چې د روان (۱۴۰۴ ) لمریز کال په لومړیو ۳ میاشتو کې، د عامو خلکو او علم پروره شخصیتونو لخوا، د ۲۲ بابه دیني مدارسو او ښوونځیو جوړولو او بیارغولو لپاره شاوخوا ۵ مېلیونه افغانۍ مرسته شوې ده.
یادې مرستې د پوهنیزې پروسې لاپیاوړتیا، د ماشومانو لپاره د مناسب تعلیمي چاپېریال چمتو کولو او د پوهنې له څانګو سره د همکارۍ په موخه ورکړل شوې دي.
په دې مرستو کې د مدارسو او ښوونځيو د ودانیو جوړولو لپاره د ځمکې وقف کول، د درسي خونو او شاوخوا دېوالونو جوړول، د تعلیمي ودانیو او د هغوی د ضمیمو بیارغونه، د څښاک پاکو اوبو برابرول، د لمریزې برېښنا سیسټمونو نصبول، د زدهکوونکو لپاره درسي موادو چمتو کول او ځینې نور توکي شامل دي.
د پوهنې وزارت د هېواد د خلکو، په ځانګړې توګه د لوګر ولایت علم پروره ولس لخوا د پوهنیز سیسټم سره د چمتو شوې مادي او معنوي مرستې څخه مننه او قدرداني کوي.
