په نیمروز ولایت کې د یو باب ښوونځي د ودانۍ بنسټ ډبره کېښودل شوه
د نیمروز ولایت مرکز زرنج ښار په شریف آباد سیمه کې د جمال الدین عرب لومړني ښوونځي د نوې ودانۍ بنسټ ډبره، د پوهنې مسئولینو، سیمه ییزو مشرانو، ښوونکو او زده کوونکو په جضور کې کېښودل شوه.
د یاد ولایت د پوهنې رئیس الحاج مولوي ګل احمد حقاني په وینا، دغه ودانۍ چې ۸ درسي خونې، احاطوي دېوال، د څښاک پاکو اوبو ۲ څاګانې او نور اړین ملحقات به ولري؛ د برادران نورزاد سوداګریز شرکت په مرسته څه د پاسه ۲ مېلیونه افغانیو لګښت سره په ۱۵۰۰ متره مربع ځمکه کې جوړېږي.
د نیمروز ولایت پوهنې رئیس وویل چې د همدغه ښوونځي جوړولو سره به د ځایی زدهکوونکو ستونزې حل شي او د ښوونځي له چارواکو او زدهکوونکو یې وغوښتل چې د ښوونځي په ساتنه او پالنه کې جدي هلې ځلې وکړي.
دا په داسې حال کې ده، چې پورته ذکر شوي شرکت تل د پوهنې ریاست سره همکاري کړې او په دې وروستیو کې یې په یاد ولایت کې د سیادک لومړني ښوونځي لپاره ځمکه اخیستې او ورته یې ودانۍ رغولې، چې د ۶۰۰ تنو ماشومانو لپاره یې ښوونیزې آسانتیاوې برابرې کړې.
د پوهنې وزارت مشرتابه د پوهنیز نظام لپاره د هېوادوالو او ملي سوداګرو له مادي او معنوي ملاتړ څخه خوښي څرګنده او په دې برخه کې د هغوی کړنې ستایي.
