کندهار کې د ۳۵۰ زره ډالرو په لګښت د ۳۰ بابه ښوونځيو بیارغونې چارې پیل شوې
پوهنې وزارت د یوې همکارې ادارې په مرسته د ۳۵۰ زره ډالرو په لګښت، د کندهار ښار سربېره په ۵ ولسوالیو کې د ۳۰ بابه ښوونځیو بیارغونې چارې، د یوې غونډې په ترڅ کې چې د پوهنې ریاست مسئولینو، سیمه ییزو چارواکو او مشرانو پکې ګډون درلود، په رسمي ډول پیل شوې.
د یاد ولايت د پوهنې مسئولينو په وينا، دغه پروژې چې ټاکل شوې په راتلونکو ۵ مياشتو کې بشپړې شي، پکې د درسي ټولګيو اساسي او معياري رغول او ترميمول شامل دي، چې په بشپړېدو سره به يې د زده کونکو د سرپناه ستونزې هوارې شي.
مسئولینو او زده کوونکو د پوهنې وزارت د دغه نېک اقدام تود هرکلی وکړ او د پوهنیزو بنسټونو په ساتلو او مراقبت برخه کې یې د پوهنې ریاست مشرتابه ته ډاډ ورکړ.
