د پکتیکا ولایت په خصوصي تعلیمي بنسټونو کې د ۳۰۰۰ تنو بې وزلو زده کوونکو لپاره د وړیا زده کړو زمینه برابره شوه
د پکتیکا ولایت د پوهنې ریاست او د دغه ولایت په مرکز او ۲۴ ولسوالیو کې د خصوصي ښوونځيو او ښوونیزو کورسونو د مؤسسینو ترمنځ د یو هوکړه لیک له مخې، ۳ زرو تنو هغو معلولینو، یتیمو او بې وزله زده کوونکو ته چې د فیس د ورکړې توان نه لري؛ په ژمنیو کورسونو کې ورته د وړیا زده کړو زمینه برابره شوه.
د پکتیکا پوهنې رئیس مولوي عبدالوکیل خالد په دې موخه جوړې شوې غونډې ته څرګنده کړه: پوهنې وزارت او د خصوصي تعلیمي مرکزونو مؤسسین د هېواد د راتلونکو نسلونو ښوونې او روزنې په برخه کې دروند دیني او ملي مسئولیت لري؛ تر څو د هیواد بچیانو ښوونې او روزنې په برخه کې هلې ځلې وکړي.
له بلې خوا د خصوصي ښوونځيو او کورسونو مؤسسینو او استازو ژمنه وکړه چې د بې وزلو ماشومانو د زده کړې په برخه کې به د پوهنې له رياست سره هراړخیزه همکاري کوي.
