د پوهنې وزارت سرپرست د یو رسمي سفر په ترڅ کې هلمند ولایت ته ولاړ
د پوهنې وزارت سرپرست الحاج مولوي حبیب الله آغا د پوهنیز وضعیت ارزونې په موخه هلمند ولایت ته ولاړ او هلته یې د دغه ولایت له پوهنې رئیس الحاج مولوي محمد عوض انصاري او مسئولینو سره وکتل.
په دې کتنه کې د پوهنې وزارت سرپرست د پوهنې ریاست د کړنو او لاسته راوړنو په اړه هر اړخیز معلومات ترلاسه او په یاد ولایت کې یې د پوهنې د بهیر لا پیاوړتیا په تړاو د سیمه ییزو چارواکو له ګټورو فعالیتونو څخه د ستاینې ترڅنګ، هغوی ته لازمې سپارښتنې وکړې.
همدارنګه نوموړي د نویو ښوونځیو جوړولو، د وېجاړو شویو ښوونځيو بیارغولو او د مسلکي ښوونکو د کمښت ستونزو د حل ژمنه وکړه.
باید ووایو، چې د پوهنې وزارت سرپرست هلمند ولایت ته د خپل سفر په ترڅ کې، د یاد ولایت له یو شمېر مدارسو او ښوونځیو څخه لیدنه او څارنه وکړه، د مسئولینو، ښوونکو او زده کوونکو نظریات او وړاندیزونه یې واورېدل او د شته ننګونو په حل کې یې د همکارۍ ډاډ ورکړ.
