د پوهنې وزارت د خدماتو رئیس لغمان ولایت ته رسمي سفر وګړ
د پوهنې وزارت د بودیجې کمېټې د پرېکړې له مخې، د یاد وزارت د خدماتو رئیس استاد حبیب الله خالد په مشرۍ یو پلاوی، د ختیزو ولایتونو پوهنې ریاستونو د مالي او حسابداري ستونزو حل په موخه، لغمان ولایت ته ورسېد.
په پیل کې پلاوي د دغه ولایت له پوهنې رئیس او یو شمېر کلیدي ځانګو آمرینو سره پر بېلابېلو پوهنیزو مسایلو هراړخیز بحث وکړ.
په دې کتنه کې پلاوي د خپل سفر اساسي موخه د پوهنې ریاست د بودیجې لګښت، د تدارکاتي پروژو څرنګوالی، د ښوونکو د تدریسي ساعتونو تنظیمول، د پوهنیزو ستونزو حل او د ترمیماتي پروژو د وضعیت ارزونه وبلله.
له بلې خوا د لغمان پوهنې رئیس پلاوي ته د ښه راغلاست ترڅنګ ژمنه وکړه، چې د پوهنې وزارت د پلاوي د موخو په تطبیق کې به هراړخیزه همکاري وکړي.
