د پوهنې وزارت د استخدام رئیس د هرات ولایت له یو شمېر مدارسو او ښوونځیو څخه لیدنه وکړه
د پوهنې وزارت د استخدام رئیس مولوي محمد صادق «صدیقي» چې د هرات ولایت د ښوونیز او روزنیز وضعیت د تحلیل په موخه دغه ولایت ته تللی، په داسې حال کې چې د یاد ولایت پوهنې مسئولینو یې ملتیا کوله، د همدغه ولایت زنده جان ولسوالۍ ته ولاړ او هلته یې د پوهنې له آمر او د ښوونځيو له ښوونکو او علماءکرامو سره وکتل.
ورپسې نوموړي دوشنې ورځ د فریده مجید، امیر معاویه، خواجه ها او یادګار ښوونڅیو ته ولاړ او د یادو ښوونځیو ښوونیز او روزنیز وضعیت یې له نیږدې وارزاوه.
همدار راز نوموړي تېره ورځ د هغه سفر په ترڅ کې چې پښتون زرغون ولسوالۍ ته یې درلود، د یادې ولسوالۍ له پوهنې آمر او مسئولینو سره په ګډه د مولانا عبدالغفور دیني مدرسې، میرآباد، سفیدا، بکه، فشنکان او بندآباد ښوونځیو څخه لیدنه وکړه او د هغو د تدریسي چارو د ارزیابۍ سربېره یې مسئولینو ته سپارښته وکړه تر څو د هېواد بچیان په اسلامي او ملي روحیې سره وروزي.
د یادو ولسوالیو چارواکو د پلاوي سفر یو نېک ګام وباله او د پوهنې وزارت د استخدام د رئیس له سفر خخه یې خوښي څرګنده کړه.
د یادو لیدنو پر مهال د زنده جان او پښتون زرغون ولسوالیو مسئولینو خپلې ستونزې او وړاندیزونه له پلاوي سره شریک کړل، چې په حل کې یې د همکارۍ ژمنه وشوه.
