د پوهنې وزارت د معلوماتو او احصائیې رئیس د غزني ولایت له پوهنې رئیس سره وکتل
د پوهنې وزارت د معلوماتو او احصائیې رئیس الحاج مولوي بسم الله نعماني، چې په غزني ولایت کې د ښوونیزو مرکزونو په کتنه بوخت دی، نن یې د یاد ولایت له پوهنې رئیس الحاج مولوي میر نصیر احمد حسیني سره وکتل.
په دې کتنه کې دواړو لوریو د غزني ولایت د ښوونیز او روزنیز وضعیت په اړه خبرې وکړې او د ورځنیو چارو په ترسره کولو کې یې د احصائیې د موثریت او ګټو، د بودیجې په ټاکلو او لګولو، د زده کوونکو، استادانو، ښوونیزو مرکزونو د کره شمېرو او احصائیو او یو شمېر نورو اړوندو موضوعاتو په تړاو یې نظرونه تبادله کړل.
له بلې خوا د پوهنې رئيس دغه ولايت ته د ورغلي پلاوي هرکلى وکړ او د غزني په ټولو ولسواليو کې يې د تعليمي ادارو د آمرینو او مدېرانو لپاره د احصائيوي سيمينارونو د پيل ډاډ ورکړ.
