د پوهنې وزارت د دعوت او ارشاد ریاست پلاوی پکتیکا ولایت ته ولاړ
د پوهنې وزارت د دعوت او ارشاد ریاست یو پلاوی د مولوي محمد نعیم عمر په مشرۍ پکتیکا ولایت ته ورسېد.
په پیل کې یاد پلاوي په هغه غونډه کې ګډون وکړ، چې پکې د یاد ولایت د پوهنې رئیس مولوي عبدالوکیل خالد سربېره اداري او تدریسي کارکوونکو هم حضور درلود.
د دعوت او ارشاد ریاست د پلاوي مشر، له منکراتو څخه د ټولنې د اصلاح په تړاو د اسلام د سپېڅلي دين د احکامو په اړه څرګنده کړه: د آمرینو اطاعت پر موږ واجب دی او له مامورينو يې وغوښتل، چې خپل ورځني کارونه په پوره اخلاص او نېکو اخلاقو سره په لاښه توګه ترسره کړي.
همدارنګه نوموړي له مسئولينو وغوښتل، چې هره ورځ د ښوونکو او زده کوونکو لپاره د دعوت او ارشاد ځانګړی نصاب تدريس کړي او سپارښتنه يې وکړه، چې د ښوونځيو مسئولين او زده کوونکي باید خپل سیرت او صورت په بشپړ ډول د رسول الله (صلی الله علیه وسلم) په سنتو برابر کړي.
دغه راز د پکتیکا پوهنې رئیس ورغلي پلاوي ته د ښه راغلاست پرمهال، هغوی ته د خپلو هراړخیزو همکاریو ډاډ ورکړ.
