د پوهنې وزارت د کیفیت تضمین معین جوزجان ولایت ته رسمي سفر وکړ
د پوهنې وزارت د کیفیت تضمین معین الحاج مولوي عبدالخالق صادق او ورسره مل پلاوی په رسمي سفر جوزجان ولایت ته ولاړ.
نوموړي په پیل کې د جوزجان ولایت د مقام مرستیال مولوي نورالدین عمیر سره په داسې حال کې وکتل، چې د یاد ولایت د پوهنې رئیس الحاج مولوي محمد طاهر جواد هم حضور درلود.
په یاده کتنه کې د جوزجان ولایت د پوهنې ریاست د ښوونیزو او روزنیزو پلانونو په تړاو خبرې وشوې او د یاد ولایت د مقام مرستیال د پوهنې وزارت مشرتابه ته د پوهنیز وضعیت لاښه والي په برخه کې د خپل ملاتړ ډاډ ورکړ.
ورپسې د پوهنې وزارت معین د جوزجان ولایت د پوهنې رئیس، آمرینو او کارکوونکو سره په جلا جلا توګه وکتل او د یاد ریاست د ستونزو په ګډون یې د کارونو او کړنو په اړه تفصیلي خبرې وکړې.
د غونډې په دوام، د پوهنې وزارت د کیفیت تضمین معین د پوهنې ریاست د مسلکي غړو له روزنیز او میتودیک سیمینار څخه لیدنه وکړه او له ګډون والو څخه یې وغوښتل، چې له خپلو زده کړو مهارتونو څخه په ورځنیو چارو کې اعظمي ګټه پورته کړي.
