په غزنی ولایت کې د یو باب لومړني ښوونځي د بنسټ ډبره کېښودل شوه
د غزني ولایت جاغوري ولسوالۍ اړوند په عُلیات سیمه کې د یو باب لومړني ښوونځي د ودانۍ لپاره د بنسټ ډبره، د پوهنې ریاست مشرتابه، دیني علماوو او قومي مخورو په ګډون کېښودل شوه.
په پلان کې ده، یاد لومړنی ښوونځی چې ۷ درسي ټولګي، یوه دفتري خونه، یو لوبغالی او نورې اړینې اسانتیاوې به ولري، په درې جرېبه ځمکه کې جوړ او ۳۰۰ تنه ماشومانو ته به د زده کړو خوندي چاپېریال برابر شي.
د ياد ښوونځي ټول لګښت څلور ميليونه افغانۍ اټکل شوى، چې د جاغوري ولسوالۍ د پوهنې مينه والو له لوري ورکول کېږي.
د پوهنې وزارت مشرتابه په داسې حال کې چې د پوهنې د بډاینې لپاره د خلکو مرستې مهمې ګڼي، د غزني ولایت د جاغوري ولسوالۍ د علم پروره خلکو له مرستو مننه وکړه.
د يادې ولسوالۍ د پوهنې آمر هم په ټولنه کې د علومو د زده کړې پر اهميت خبرې وکړې او ويې ويل: د دې ښوونځي په جوړېدو سره به د سیمې د ماشومانو ګڼ شمېر ستونزې حل او د درسونو لپاره به یې لازمې آسانتیاوې رامنځته شي.
