په ننګرهار ولایت کې د يو باب لېسې نوې ودانۍ لپاره د بنسټ ډبره کېښودل شوه
د ننګرهار ولايت خوګياڼو ولسوالۍ چمتال عالي لېسې د نوې ودانۍ لپاره بنسټ ډبره، د يو لړ مراسمو په ترڅ کې چې پکې د پوهنې رياست مشرتابه، د دولتي ادارو مسئولينو، پوهنې سره د مرستې کوونکو بنسټونو استازو، علماوو او قومي مشرانو ګډون درلود، کېښودل شوه.
په پلان کې ده، ياده ودانۍ په دوو بلاکونو کې د يومرستندويه بنسټ په مالي ملاتړ چې د پوهنې په برخه کې مرسته کوي، په پاخه او اساسي ډول جوړه شي .
د يادونې وړ ده، چې د لېسې په هر يو نوي بلاک کې ١٢ درسي ټولګي، ٤ اداري خونې، د کمپيوټرخونې، لابراتوار خونې او اړين ملحقات شامل دي.
د ننګرهار ولايت پوهنې رئيس مفتي حبيب حضرت حقاني له مرستندويه بنسټ څخه مننه وکړه او زياته يې کړه: ياده لېسه شاوخوا پنځه زره زده کوونکي لري، چې د نوې ودانۍ په جوړېدو سره به يې زده کوونکو ته د زده کړې مناسب چاپېريال برابر شي.
