له ولایتونو څخه د پوهنې خبرونو لنډيز
ننګرهار
د ننګرهار ولایت پوهنې ریاست، د یاد ولایت د کډوالو په کمپونو کې له پاکستان څخه د راستنو شویو زده کوونکو د ثبت لړۍ پیل کړې ده.
د پوهنې وزارت تر رهبرۍ لاندې به په يادو کمپونو کې ښوونکي وګمارل شي، څو هغوى ته د زده کړو د دوام آسانتیا برابره شي.
همدارنګه:
د ننګرهار ولایت پوهنې ریاست له ۲۵۷ تنو نوماندانو څخه ډله ییزه آزموینه واخیسته.
په پلان کې ده، ۲۹ تنه چې معياري نمرې تر لاسه کړي، د یاد ولايت په ښوونځيو کې د ښوونکو په توګه وګمارل شي.
دایکنډي
د دايکنډي ولايت پوهنې رياست د ښوونځيو کارکوونکو، ښوونکو او زده کوونکو له خپلو شخصي پيسو څخه، د هرات ولايت له زلزله ځپلو سره د مرستې په موخه ټولټال ٥٦٩ زره ٥٠٠ افغانۍ راټولې کړې دي.
راټولې شوې پیسې به په رسمي ډول د پوهنې وزارت د رهبرۍ له لارښوونې سره سم مسئولینو ته وسپارل شي.
هرات او جوزجان
د هرات او جوزجان ولایتونو پوهنې رئیسانو د یادو ولایتونو د رسمي او خصوصي ښوونځیو له مسئولینو، آمرینو او مدیرانو سره د جلا جلا کتنو په ترڅ کې، په ښوونځیو کې د پوهنې د کیفیت د لاښه والي په ګډون په بېلابېلو موضوعاتو خبرې وکړې.
د پوهنې رئیسانو د ادارو تر منځ پر لا زیاتې همغږۍ او همکارۍ خبرې وکړې او په دې برخه کې یې لازمې لارښوونې وکړې.
بلخ
د پوهنې وزارت د کیفیت تضمین معینیت د څارنې او ارزونې ریاست یو پلاوی، بلخ ولایت ته تللی او ټاکل شوې چې د پوهنې ریاست له کړنو او اجراآتو څخه څارنه وکړي.
د بلخ پوهنې رئيس مولوي عبدالجليل شهیدخېل د پوهنې وزارت پلاوي ته د همکارۍ او آسانتياوو برابرولو ژمنه وکړه.
