د پوهنې وزارت د سرپرست له لوري په جوزجان ولایت کې د یوې لېسې نوې ودانۍ پرانیستل شوه
په هغو مراسمو کې چې د جوزجان ولایت پوهنې رئیس الحاج مولوي محمد طاهر جواد، علماوو،استادانو او زده کوونکو هم حضور درلود، د پوهنې وزارت سرپرست الحاج مولوي حبیب الله آغا له لوري د جوزجان ولایت آقچې ولسوالۍ د آقچه نمای کلي د عالي لېسې نوې ودانۍ پرانیستل شوه. د پوهنې رئیس یاد ولایت ته د پوهنې وزارت سرپرست ورتګ یو نېک ګام وباله او د پوهنې ریاست د کړنو په اړه یې ورغلي پلاوي ته د یاد ریاست کاري راپور وړاندې کړ.
د يادونې ده، چې د يادې ولسوالۍ د آقچه نمای کلي د عالي لېسې ودانۍ په دوه نيم جرېبه ځمکه کې د دوه سوه زره امريکايي ډالره لګښت سره، په دوو پوړونو کې جوړه شوې، چې د اړینو ملحقاتو سربېره ٣٢ درسي خونې لري او په دوو وختونو کې د ١٥٠٠ زده کوونکو ظرفيت لري.
د پوهنې وزارت سرپرست د یادې لېسې د نوې ودانۍ پرانیستنه یو نېک ګام وباله او د پوهنې وزارت د راتلونکو پلانونو په اړه یې ګډون والو ته معلومات وړاندې کړل.
د يادونې وړ ده، چې په روانه اوونۍ کې د یاد ولایت اړوند د یوه ښوونځي د نوې ودانۍ چارې پیل او د يوه بل ښوونځي نوې ودانۍ ګټې اخیستنې ته وسپارل شوه.
