کاپیسا ولایت کې د یوه ښوونځي بنسټ ډبره کېښوول شوه
پوهنې وزارت، کاپیسا: د کاپیسا ولایت کوهستان ولسوالۍ په لومړۍ برخه کې د چشمه معاذالله منځني ښوونځي بنسټ ډبره د کاپیسا والي عبدالطیف مراد او د دغه ولایت د پوهنې رئيس عبدالعلیم عیار لخوا د یو لړ مراسمو په ترڅ کې چې د ښار جوړونې رئيس خواجه مصور صدیقي، ولسوال حمزه خان وهاب، قومي مخورو او یو شمیر استادانو او زده کوونکو ګډون درلود، کیښوول شوه.
د کاپیسا والي عبداللطیف مراد د پوهنې په برخه کې د ولسمشر له پاملرنې مننه وکړه، او د سل ورځې او سل زیري د برنامې په دوام کې یې کاپیسا ولایت کې د ۸ نويو ښوونځي د ودانیو کار پیل او اعلان کړ.
همدارنګه د کاپیسا د پوهنې رئيس عبدالعلیم عیار د ښوونې او روزنې لپاره خوندي چاپیریال د تعلیم له اړينو عناصرو څخه وباله او زیاته یې کړه: د دې ښوونځي د ودانې په بشپړیدو سره به د پنځه سوه زده کوونکو ته د تعليم خوندي چاپيريال برابر شي.
د چشمه معاذالله منځنى ښوونځی د ښارجوړونې او ځمکو وزارت بودجې څخه د ۳۰ میلیونه، ۷۶۳ زره او ۲۶۹ افغانیو په لګښت په دوه پوړونو کې د ۱۲ ټولګيو، د کمپیوټرخونو، لمریز بریښنايي سیسټم، میزونو او چوکیو په در لودلو سره جوړیږي.
