د ښوونکو يولس زره نوي بستونه اعلان ته وسپارل شول
هغه غونډه کې چې نن په چهارچنارماڼۍ کې د ښيې حکومتولۍ په پار د جلالتمآب ولسمشر په حضور جوړه شوې وه، د پوهنې وزارت سرپرستې رنګينې حميدي، او د ياد وزارت مشرتابه هم ګډون درلود، چې
په دې غونډه کې د ولسمشر له لوري د ځانګړې تڼۍپه کيکاږلو سره، د ښوونکو يولس زره بستونه په دوو پړاونو کې اعلان ته وسپارل شول.
په دې ناسته کې ولسمشر غني د ملکي خدمتونو په ټولو ادارو کې معارف خورا مهم وګڼه، په ډاګه يې کړه، په تيرو کلونو کې د دې وزارت د بشري سرچينو رياست کې د موجود اداري فساد او تبعيض له امله، د ښوونکو بستونه په عادلانه او متوازن ډول ټولو ولايتونو ته ويشل شوي نه و، ځينو ولايتونو کې خو حتى يو ښوونکی هم ګمارل شوى نه و.
د هيواد ولسمشر په دې وزارت کې د نوي ريفورم په پلي کيدو ټينګار وکړ زياته يې کړه: له شته ستونزو او ننګونو څخه د وتلو يوازينۍ لاره د نوي اصلاحي ريفورم پلي کول دي او ډاډه يم چې په کوټلو ګامونو سره به د هيواد د پوهنيزم نظام کيفيت لوړو او دا چاره به په پوره برياليتوب سره ترسره کړو.
پوهنې وزارت د دولت هره هغه برنامه چې د پوهنيز نظام د پياوړتيا لپاره وي په ښه توګه پلې کوي او د نوي اصلاحي ريفورم پلي کول خپله دنده ګڼي او په دې برخه کې هيڅ ډول هلې ځلې نه سپموي.
