پکتیکا ولایت کې د نجونو يو نوى ښوونځى پرانیستل شول
پوهنې وزارت، پکتیکا: د پکتیکا ولایت مټا خان ولسوالۍ کې د لومړي ځل لپاره د التقوا په نوم د نجونو يو ښوونځى د یو لړ مراسمو په ترڅ کې د پوهنې ریاست تدریسي مرستیال صالح محمد ظفر، د مټاخان ولسوالۍ ولسوال عبدالقهار همتیار، د سیمې قومي مخورو، ځوانانو او د رسنیو استازو په ګډون سره پرانيستل شو.
د دې ښوونځي د پرانیستې په پار د سیمي قومي مخورو د پکتیکا د پوهنې ریاست نه مننه وکړه چې په دې ولسوالۍ کې یې د نجونو لومړنى ښوونځى پرانيست.
همداراز دوى د سیمي له يوه اوسیدونکي حاجي انور نه هم مننه وکړه چې خپله شخصي ځمکه يې ښوونځي ته ورکړې.
د مټاخان ولسوالۍ ولسوال عبدالقهار همتیار وویل: د ویاړ ځای دی چې په دې ولسوالۍ کې د لومړي ځل لپاره د نجونو ښوونځى پرانيستل کیږي.
نوموړي هم د پکتیکا ولایت د پوهنې ریاست کړنې وستایلې او د فقیر کلا د سیمو اوسیدونکو سره یې د هر ډول همکاریو ژمنه وکړه.
همداراز د پکتیکا ولایت د پوهنې ریاست تدریسي مرستیال صالح محمد ظفر هم د مټاخان ولسوالۍ خلکو ته د پوهنې په برخه کې د هر ډول مرستو او همکاریو ډاډ ورکړ.
نوموړي زیاته کړه: د ویاړ ځای دی چې د التقوا د نجونو ښوونځي کې به د دې سیمي شاوخوا د ۲۰۰ کورنیو نجونې زده کړې وکړي.
