په نیمروز ولایت کې یوه ښوونځي لپاره نوې ودانۍ و پېرل شوه
د نیمروز ولایت مرکز زرنج ښار کلوخک کلي اړوند د اخترمحمد خان لومړني ښوونځي لپاره یوه ودانۍ د یاد ولایت یو تن علمپرور شخصیت محترم الحاج نظیراحمد نورزاد له لوري وپېرل شوه.
پورته ذکر شوې ودانۍ له اساسي بیارغونې، درسي موادو او اړینو تدریسي وسایلو له برابرولو وروسته، د یوې ځانګړې غونډې په ترڅ کې د نیمروز ولایت پوهنې رئیس محترم الحاج مولوي ګل احمد حقاني په حضور کې ګټې اخیستنې ته وسپارل شوه.
د یاد ولایت پوهنې رئیس په خپلو خبرو کې د نوموړي علمپرور شخصیت دغه نېک اقدام وستایه او زیاته یې کړه، چې پوهنې ته د دغې ودانۍ په ډالۍ کولو سره د سیمې سلګونو ماشومانو ته مناسب تعلیمي چاپېریال برابر شو.
د یادونې وړ ده، د ښوونځي دغه ودانۍ د ۱۵ لکه افغانیو په لګښت پېرودل شوې، چې ۸ درسي ټولګي، یوه اداري خونه او نورې اړینې اسانتیاوې لري.
