په ننګرهار کې په کارونو بوختو ماشومانو ته د تعليم په موخه سيستم رامنځته شو
د پوهنې وزارت.، ننګرهار: د ننګرهار ولايت کار او ټولنيزو چارو، پوهنې او عامې روغتيا رياستونو، د خښتو د بټيو او کارګرو اتحاديې په همغږۍ د يوې غونډې په ترڅ کې د خښتو بټيو کې ماشومان له سختو کارونو څخه د ژغورلو او روزنې په موخه سيستم رامنځته کړ.
په هغه غونډه کې چې په همدې موخه جوړه شوي وه د ولايت مرستيالې حبيبې کاکړ وويل، چې د خښتو بټيو مالکانو سره يې خبرې کړي، ترڅو پر ماشومانو د شاقه کارونو مخنيوی وشي او د یادو ماشومانو د کورنيو غړو سره به د نغدو پیسو او خوراکي توکو مرسته کيږي، ترڅو خپل اولادونه د کار په ځای ښوونځي ته وليږي.
هغې زياته کړه، چې يادو ماشومانو ته به د پوهنې، روغتيا او نورو بېلابېلو برخو کې هم لازم سهولتونه رامنځته شي.
همدارنګه د پوهنې رئيس حسيب الله شينواري وويل، هر ماشوم تر اتلس کلنۍ پورې پر کورنۍ او ټولنه حق لري، چې د خوړو، کالیو، استوګنځي او روغتیا ترڅنګ زده کړو ته لاسرسی ولري.
پوهنې ریاست مکلف دی چې دوی ته د زده کړو فرصت برابر کړي. هغه وویل پوهنې ریاست د سره رود ولسوالۍ په بېلابېلو سيمو کې ۲۵۰ کليوالي ښوونځي جوړ کړي چې اته ښوونځي د بټیو کاریګرو ماشومانو لپاره دي، چې ګڼ شمېر نارينه او ښځينه زده کوونکي په کې په زده کړو بوخت دي، چې له شپږم ټولګي وروسته لېسو ته ور وپېژندل کيږي.
د کار ټولنيزو چارو رئيس عبدالحکيم شېرزاد وويل، چې نن يې د پوهنې، عامې روغتيا، خښتو بټيو او کارګرانو اتحاديې سره په همغږۍ خښتو بټيو کې شاوخوا درې زره ماشومان چې په شاقه کارونو بوخت دي د ژغورلو او ورته د تعليم زمينې برابريدو په موخه سیستم جوړ کړ.
نوموړي وويل، چې پرېکړه وشوه، چې له پنځلس کلنو کم عمره ماشومان به نور شاقه کارونه نه کوي او د دې عمر څخه پورته کسان به د تعليم ترڅنګ وروسته له وخته ساده او اسانه کارونه مخته وړي.
پدې غونډه کې، د حج او اوقافو چارو رییس او د سرخ رود ولسوال هر یو په خپل وار خبرې وکړې او ژمنه یې وکړه چې د ماشومانو لپاره د کار د آسانتیاوو په برابرولو کې همکاري وکړي.
