په فراه ولایت کې د یوې دیني مدرسې د بنسټ ډبره کېښودل شوه
د فراه ولایت مرکز اړوند په سیدآباد کلي کې «د مظهر العلوم اکراميه» دیني مدرسې لپاره د بنسټ ډبره، د یاد ولایت د پوهنې ریاست مشرتابه، دیني علماوو او قومي مخورو په حضور کې کېښودل شوه.
یاده دیني مدرسه په یو جرېب ځمکه کې د دوه میلیونه افغانیو په لګښت، د یو تن معارف دوسته شخص او د سیمې د اوسېدونکو په همکارۍ جوړېږي.
د پوهنې وزارت مشرتابه د علم او پوهې پر زده کړې د ټینګار ترڅنګ، د هېواد د پوهنیزنظام په پرمختګ کې د خلکو له ملاتړ څخه مننه وکړه.
همدارنګه د پوهنې ریاست مسئولینو او علماوو هم د ټولنې په پرمختګ کې د دیني او عصري علومو پر ارزښت او رول ټینګار وکړ.
د يادونې وړ ده، چې د دغه مدرسې په جوړېدو سره به شاوخوا ۵۰۰ تنو زده کوونکو ته په مناسب ښوونیز چاپېريال کې د زده کړو آسانتیا برابره شي.
