په غزني ولایت کې د ۸ مېلیونه افغانیو په لګښت د یو باب ښوونځي د ودانۍ بنسټ ډبره کېښودل شوه
د غزني ولایت پوهنې رئیس الحاج مولوي میر نصیر احمد حسیني له یو پلاوي سره د یاد ولایت ناور ولسوالۍ په ورکلاخ سیمه کې د شهید غلام حیدر ښوونځي د نوې ودانۍ بنسټ ډبره کېښوده.
په یادو مراسمو کې د ناور ولسوال، پوهنې آمر، قومي مشرانو، ښوونکو او ګڼ شمېر زدهکوونکو هم ګډون درلود.
دغه ښوونځی په څلور جرېبه ځمکه کې د خلکو په مالي ملاتړ د شاوخوا ۸ مېلیونه افغانیو لګښت سره جوړېږي، چې په دوه پوړونو کې به ټولټال ۱۲ درسي ټولګي، ۴ اداري خونې، منظم برېښنایي سیسټم او د پاکو اوبو شبکه ولري.
د غزني ولایت پوهنې رئیس په خپله وینا کې د پوهنې په برخه کې د خلکو له هڅو څخه د ستاینې ترڅنګ ډاډ ورکړ چې د پوهنې وزارت په ټول هېواد کې د مدارسو او ښوونځیو پراختیا ته ژمن دی.
