په غزني ولایت کې د یو شمېر ولسوالیو ښوونکو لپاره علمي سیمینار پیل شو
د پوهنې وزارت ساینس مرکز ریاست، د غزني ولایت د زنخان، واغظ، خواجهعمري، جغتو او خوږیاڼي ولسوالیو کې د ښوونځیو د ساینسي مضمونونو ښوونکو لپاره په درېیو مرحلو کې شپږ ورځنی سیمینار پیل کړ.
د یاد سیمینار لومړۍ مرحله د پورته ذکر شویو ولسوالیو د ۶۰ تنو ښوونکو لپاره ترسره شوه او پکې د ساینس مختلفې برخې لکه ریاضي، فزیک، کیمیا، بیولوژي او چاپېریالي ساینس شامل دي.
دغه سیمینار چې د غزني ولایت پوهنې ریاست چارواکو لخوا پرانیستل شو، په پایله کې به یې د ساینسي مضمونونو ښوونکي، د نویو تدریسي مېتودونو په رڼا کې د تعلیمي او تجربوي موادو په کارولو سره علمي او عملي زدهکړې ترلاسه کړي.
د پوهنې ریاست چارواکو په وینا، د یاد سیمینار راتلونکې پړاوونه به د مرکز او یو شمېر نورو ولسوالیو د تعلیمي مرکزونو د ۳۳۰ تنو ښوونکو لپاره پلي شي.
