په غزني ولایت کې د بدني روزنې ښوونکو لپاره سیمینار جوړ شو
د غزني ولایت په پوهنې ریاست کې د ښوونځیو د بدني روزنې اړوندو ښوونکو د مسلکي او سپورټي وړتیاوو لوړولو لپاره یو ورځنی سیمینار ترسره شو.
په یاد سیمینار کې د ځوان نسل په سالمه روزنه کې د سپورټ رول، د سپورټي تمرینونو د تدریس نوي مېتودونه او د زدهکوونکو لپاره د فزیکي فعالیتونو اهمیت په اړه ځانګړي موضوعات شامل وو.
په پای کې، د روزنیزو موادو او پروګرامونو او د سپورټ اصولو په ګډون تعلیمي کڅوړې د بدني روزنې ښوونکو ته ووېشل شوې.
ښوونکو د وړتیا لوړولو په برخه کې له دغه شان غونډو هرکلی وکړ او په راتلونکي کې یې د داسې نورو پروګرامونو غوښتنه وکړه.
