په سرپل ولایت کې یو باب منځني ښوونځي لېسې ته ارتقاء وکړه
د سرپل ولایت کوهستانات ولسوالۍ اړوند «د نګاله کلي منځني ښوونځي» لېسې کچې ته ارتقاء وکړه.
د یاد منځني ښوونځي د ارتقاء چارې د سرپل ولایت د پوهنې ریاست په وړاندیز او د پوهنې وزارت د عالي مقام په منظورۍ ترسره شوې.
هغه غونډه چې په همدې موخه د يادې لېسې په انګړ کې د پوهنې رئيس مولوي محمد رحماني، د سيمې د علماوو، ښوونکو او زده کوونکو په ګډون سره جوړه شوې وه، په ترڅ کې یې د پوهنې رئيس د ښوونې او روزنې رول د هېواد په پرمختګ کې مهم وباله او د يادې لېسې له پوهنیزو چارو یې خوښي څرګنده کړه.
ورپسې نورو ويناوالو هم د سرپل د پوهنې رياست له کړنو او پروګرامونو ملاتړ وکړ او د پوهنې په برخه کې يې د خلکو د همکارۍ غوښتنه وکړه.
د مراسمو په پای کې د نګاله منځني ښوونځي لېسې ته د ارتقاء ورکولو مکتوب، د کوهستاناتو ولسوالۍ د پوهنې آمر مولوي محمد نعمان کریمي له خوا ولوستل شو او مراسم د پټۍ په پرې کولو او د هېواد لپاره د آبادۍ په دعائیې سره پای ته ورسېدل.
