په جوزجان ولایت کې د یوه ښوونځي د بنسټ ډبره کېښودل شوه
د جوزجان ولایت د خانقاه ولسوالۍ په یوه لرې پراته کلي کې د تازه نهر د لومړني ښوونځي د بنسټ ډبره د یو لړ هغو مراسمو په ترڅ کې چې پکې د ياد ولايت پوهنې رئیس، ولایتي چارواکو، علماوو او د سیمې خلکو ګډون درلود، کېښودل شوه.
د ياد ښوونځي د جوړولو ټولیيز لګښت یو میلیون او ۲۰۰ زره افغانۍ اټکل شوی، چې د ياد ولایت د پوهنې د یوه مینه وال له لوري ورکول کیږي.
د ياد ښوونځي نوې ودانۍ ۵ درسي ټولګي، يوه اداري خونه له نورو اړينو ملحقاتو سره لري.
دجوزجان پوهنې رئيس الحاج مولوي محمدطاهر جواد، دپوهنې دوست دغه هېوادوال له مرستې څخه د مننې په څرګندولو سره زياته کړه چې د ياد ښوونځي د ودانۍ په جوړولو سره به څه دپاسه ٢٠٠ تنو زده کوونکو ته دزده کړې خوندي چاپېريال رامنځته شي .
په ورته وخت کې د سیمې اوسېدونکي هم د خوښۍ په څرګندولو سره وايي: د ياد ښوونځي په جوړېدو سره به د دوی د ماشومانو د ښوونځي او ټولګیو د نشتوالي ستونزه هواره او په دې سره به زده کوونکي زده کړو ته لاوهڅول شي.
