میدان وردګو ولایت کې د نیالګیو کینولو کمپاین لا هم روان دی
د پوهنې وزارت، میدان وردګ: په ښوونیزو بنسټونو کې د سمسور چاپیریال رامینځته کولو په موخه د میدان وردګو ولایت په الفتح دارالعلوم کې ۲۰۰ قلمې میوه لرونکي او ښکلاییز نیالګي ولګول شول.
په هغه غونډه کې چې په همدې موخه جوړه شوې وه د پوهنې ریاست د اسلامي تعلیماتو مرستیال الحاج محمدآقا رحماني د کرنې او مالدارۍ ریاست او د یاد ولایت له اولسونو څخه د نیالګیو د ورکړې په پار مننه وکړه او وې ویل: که تعلیمي بنسټونه سمسور او زرغون چاپیریال ولري نو دا د دې لامل کیږي چې زده کوونکي په ښه توګه زده کړې وکړي ځکه د تعلیمي بنسټونو سمسورتیا د زده کوونکو په ذهني پیاوړتیا کې خورا اغیزناک رول لري.
وروسته د تابش خصوصي پوهنتون رئیس میراجان حقدوست او د الفتح دارالعلوم آمر عزیزالرحمن رحماني د سمسور او زرغون چاپیریال په ګټو خبرې وکړې او زیاته یې کړه: د چاپیریال سمسورتیا د انسان په روغتیا باندې مثبتې اغیزې لري او له ټولو زده کوونکو یې غوښتنه وکړه څو د نیالګیو پالنې او ساتنې ته پاملرنه وکړي.
