قندهار کې د باالمقطع ښوونکو د ګمارنې په موخه آزموینه واخیستل شوه
د پوهنې وزارت، قندهار: د قندهار ولایت په ولسوالیو کې د بالمقطع ښوونکو د استخدام په دوام د بولدک او دامان په ولسوالیو کې د باالمقطع ښوونکو د ګمارنې په موخه د ۸۵۹ تنو نارینه او ښځینه کاندیدانو څخه د آزاد رقابت له لارې آزموینه واخیستل شوه.
په دغه آزموینه کې د لوړو زده کړو د فارغینو ترڅنګ د نیمه لوړو زده کړو او بکلوریا فارغانو ګډون کړی وو چې د یوې رڼې پروسې په پایله کې به ۲۵۰ تنه د بولدک ولسوالۍ او ۱۰۰ تنه دامان ولسوالۍ لپاره د تدریسي رشتې مطابق د باالمقطع ښوونکو په توګه پر دندو وګمارل شي.
د قندهار د پوهنې ریاست د اداري چارو آمر جمال ناصر اصلان د آزموینې ګډونوالو ته د آزموینې د شفافیت ډاډ ورکړ او زیاته یې کړه د دغو ښوونکو په ګومارنې سره به په ښوونځيو کې د ښوونکو د کمښت ستونزه هواره شي.
د یادونې وړ ده، چې د قندهار پوهنې ریاست درې ورځي وړاندې هم له ۸۹۴ تنو څخه د باالمقطع ښوونکو د ګمارنې په موخه آزموینه واخیسته، چې له ډلې یې ۱۸۸ تنه د ډنډ ولسوالۍ په بېلابېلو ښوونځیو کې پر دندو ګمارل شوي دي.
