غزني ولایت کې د ۲۰ مېلیونه افغانیو په لګښت د ښوونځي ودانۍ پرانیستل شوه
د غزني ولایت مرکز اړوند آزاد خان بابا عالي لېسې نوې ودانۍ د ځايي خلکو په مالي مرسته، چې شاوخوا ۲۰ مېلیونه افغانۍ لګښت پرې راغلی، د هغو مراسمو په ترڅ کې پرانیستل شوه چې پکې د پوهنې رئیس، چارواکو، ولایتي مسئولینو، یو شمېر علماءکرامو او فرهنګي شخصیتونو ګډون درلود.
یاده دوه پوړیزه ودانۍ چې په ۶ جرېبه ځمکه کې جوړه شوې، ۱۴ درسي ټولګي، ۸ اداري خونې، لابراتوار خونه او نورې اړینې اسانتیاوې لري.
د غزني ولایت پوهنې رئیس په خپله وینا کې د ښوونځیو په جوړولو کې د خلکو ونډه د ښوونیز نظام ودې او پرمختګ لپاره ارزښتناکه وبلله او زیاته یې کړه چې د ښوونځیو لپاره د معیاري ودانیو رغول د زدهکوونکو په تعلیمي بهیر کې ښه والی راولي.
د پوهنې وزارت مشرتابه د هېوادوالو، په ځانګړې توګه د غزني ولایت علمپروره خلکو، له مادي او معنوي ملاتړ څخه مننه کوي.
