غزني ولایت کې د ۱۱۰ مېلیونه افغانیو په لګښت د ۱۰ بابه ښوونځیو نوې ودانۍ پرانیستل شوې
د غزني ولایت په آببند، ګیلان او اجرستان ولسوالیو کې د ۱۰ بابه ښوونځیو نوې تدریسي ودانۍ، چې د ۱۱۰ مېلیونه افغانیو په لګښت جوړې شوې دي، د یو لړ مراسمو په ترڅ کې چې پکې د پوهنې وزارت د مقام د دفتر لوی رئیس محترم الحاج مولوي شهاب الدین ثاقب، پوهنې رئیس محترم الحاج مولوي میر نصیر احمد حسیني، چارواکو او مسئولینو ګډون درلود، افتتاح او ګټې اخیستنې ته وسپارل شوې.
یاد ښوونځي چې د یوې همکارې ادارې په مالي ملاتړ جوړ شوي، هر یو یې ۶ درسي ټولګي، یوه اداري خونه، د څښاک پاکو اوبو منظم سیسټم، لمریزه برېښنا، احاطوي دېوال او نور اړین ملحقات لري.
د پورته ذکر شویو ښوونځیو د پرانیستې په مراسمو کې؛ د غزني ولایت پوهنې محترم رئیس د پوهنې پر اهمیت ټینګار وکړ او ویې ویل: "زموږ پرمختګ د مدارسو او ښوونځيو په جوړولو کې دی او که موږ د هغوی کیفیت ته پام وکړو، موږ کولی شو روښانه او باثباته راتلونکې ولرو."
همدارنګه، د پوهنې وزارت د مقام د دفتر محترم لوی رئیس هم ډاډ ورکړ چې د پوهنې وزارت ژمن دی تر څو خلکو ته په ټولو برخو کې، په ځانګړې توګه د پوهنې په برخه کې هراړخیز چوپړونه وړاندې کړي.
د یادونې وړ ده چې په غزني ولایت کې د تعلیمي زیربیناوو دغه پروژې د پوهنې وزارت د پراخو هڅو یوه برخه ده.
