سلطان غازي بابا ښوونځي ته نوې ودانۍ جوړه او ګټې اخیستنې ته وسپارل شوه
د پوهنې وزارت، لغمان: د لغمان ولایت په مرکز مهترلام کې د سلطان غازي بابا ښوونځی د ۱۹ میلیونه،۳۶۱ زره او ۷۰۹ افغانیو په لګښت د دولت د پراختیايي بودیجې څخه په ۶٫۴ جریبه ځمکه کې د عبدالله ارشاد ودانیز شرکت له لوري جوړ شو.
د یاد ښوونځي په پرانیستغونډه کې د لغمان د پوهنې رئيس عبدالله حمیدي، مرستیال والي خواجه محمد عصامي، د ولایتي شورا غړیو، قومي مشرانو، ښوونکو او ځینې زده کوونکو ګډون کړی و، چې یاد ښوونځی د پوهنې رئیس له لوري پرانیستل شو.
د لغمان ولایت د پوهنې رئیس عبدالله حمیدي د یاد ښوونځي په پرانیستغونډه کې ګډونوالو ته ښه راغلاست وویل او زیاته یې کړه: دا ښوونځی ۸ ټولګي او اداري خونې، ۳۳۶ جوړې میزونه او چوکۍ او نورې ښوونیزې اسانتیاوې لري چې په پرانیستلو سره يې ټول ټال ۳۲۷۲ تنه هلکانو او نجونو ته د زده کړو خوندي چاپيریال برابرشو.
نوموړي د یاد ښوونځي د جوړولو په پار د ښارجوړونې وزارت له مشرتابه څخه مننه وکړه او د سیمې له اولسونو یې وغوښتل چې خپل ماشومان ښوونځي ته ولیږي، څو روښانه راتلونکی ولري، همداراز د ښوونځيو چارواکو ته یې سپارښتنه وکړه چې د ښوونځي سمسورتیا ته پاملرنه وکړي.
