زابل کې زده کوونکو ته د کانکور د چمتوالې کورسونه جوړ شول
د پوهنې وزارت، زابل: د زابل ولایت د شاه جوي ولسوالۍ د دولسمو ټولګیو زده کوونکو ته د کانکور د چمتوالي کورسونه پیل شول.
دا کورسونه د زابل د پوهنې ریاست په همکاری او په مشرانو جرګه کې د زابل د خلکو استازِي ډاکتر زلمي زابلې په مالي لګښت جوړ شوي، چې د دولسمو ټولګیو زده کوونکو ته د کانکور د تیاري او ساینسي مضمونونو په برخه کې زده کړې ورکول کېږي تر څو زده کوونکي د راتلونکي کال د کانکور ازموینې ته چمتوالی ونیسي.
د زابل د پوهنې رئیس نصرالله زاهد د یادو کورسونو جوړول د دولسمو ټولګیو د زده کوونکو لپاره ډېر ضروري وبلل او د دولسمو ټولګیو له ټولو زده کوونکو نه یې وغوښتل، چې په جوړ شویو کورسونو کې ګډون وکړي او د کانکور آزموینې ته چمتوالی ونیسي.
د یادونې وړده، چې د زابل د پوهنې ریاست په تېرو کلونو کې هم د دولسمو ټولګیو زده کوونکو ته ورته کورسونه جوړ کړي دي.
