د کابل ښار ښوونیزو ناحیو اداري کارکوونکو ته ۴ ورځنی علمي سیمینار پیل شو
د پوهنې وزارت د کارکوونکو چارو لوی ریاست لخوا، د کابل ښار ښوونیزو ناحیو اړوندو اداري کارکوونکو ته «د کاري مهارتونو لوړولو» تر عنوان لاندې علمي سیمینار، د یاد وزارت د کارکوونکو چارو لوی رئیس مفتي شفیع الله منصور، د کابل ښار پوهنې رئیس قاري عدالباسط حقاني، مسئولینو، کارپوهانو او کارکوونکو په حضور کې پرانیستل شو.
په پيل کې د پوهنې وزارت د کارکوونکو چارو لوی رئیس ګډون والو ته د ښه راغلاست ترڅنګ، د اداري کارکوونکو د کاري وړتیاوو لوړولو ارزښت په اړه تفصیلي وینا وکړه او ویې ویل: د پوهنې منسوبینو اداري او تدریسي وړتیاوې لوړول د پوهنې وزارت په کاري لومړیتوبونو کې ځای لري، چې په پر مټ یې په اداري چارو کې لاپسې چټکتیا او روڼتیا رامنځته کېږي.
ورپسې د کابل ښار پوهنې رئیس د علمي سیمینارونو مثبتې اغېزې تشرېح کړې او له ګډون والو یې وغوښتل چې د سیمینار له موادو او منځپانګې څخه اعظمي ګټه پورته کړي.
د یادونې وړ ده، چې د کارپوهانو له لوري به د همدغه سیمینار پر مهال ګډون والو ته د اداري مهارتونو اړوند پرېزنټېشنونه وړاندې او د هغوی پوښتنو ته به لازم ځوابونه ورکړل شي.
