د څو ولایتونو له پوهنې کړنو لنډ خبرونه
ــ فاریاب
د پوهنې وزارت تخنیکي ټیم د فاریاب ولایت پوهنې مسئولینو سره د لیدنې په ترڅ کې د یو لړ موضوعاتو په هکله لکه: د برېښنایي وسایلو د ثبت څارنه، د ګدامونو او ډیپوګانو مدیریت، د حوالو ترتیب د سیسټم له لارې، د کارکوونکو لارښوونه د هغوی په دندو کې، د وسایلو ثبت او سندونو په تړاو خبرې وکړې.
ــ پنجشېر
د پوهنې وزارت د کیفیت تضمین معینیت لخوا پنجشېر ولایت ته استول شوي نظارتي ټیم د ولایت مرکزي شعبو سربېره د حصه اول، پریان او دره ولسوالیو پوهنې آمریتونو په اړه د ۲۰ ورځنۍ څېړنې پایلې له پوهنې رئیس محترم الحاج مولوي محمد طالب ثاقب او د پروګرامونو له مسئولینو سره شریکې کړې.
ــ بادغیس
د بادغیس ولایت پوهنې رئیس، محترم الحاج مولوي محب الله احسان لخوا «مؤثره زدهکړه او تدریس ته وده ورکول» تر سرلیک لاندې درې ورځنی سیمینار د مرکز اړوند د ښوونکو مسلکي پراختیا د ۴۴ تنو علمي غړو او د ولایت ۱۰ اداري واحدونو د غړو لپاره پرانیستل شو.
ــ تخار
د تخار ولایت په مرکز کې د ښوونځیو ترمنځ د فوټبال خزاني ټورنمنټ چې څو ورځې مخکې د ۱۱ سپورټي لوبډلو ترمنځ پیل شوی و، د آهندر لوبډلې په بریا سره پای ته ورسېد.
د سرای سنگ او الفاروق ښوونځیو لوبډلو په ترتیب سره دویم او درېیم مقامونه ترلاسه کړل، چې په پای کې غوره لوبډلې د مسئولینو لخوا د ډالیو په وېشلو سره وهڅول شوې.
