د پکتیا ولایت په مرکز او څمکنیو ولسوالۍ کې د سواد زده کړې ښوونځي پرانېستل شول
د پوهنې وزارت، پکتیا : د پکتیا ولایت په څمکنیو ولسوالۍ کې د سواد زده کړې ښوونځی د یاد ولایت د پوهنې رئیس استاد کوچي ځاځي لخوا په داسې حال کې، چې د یادې ولسوالۍ ولسوال، امنیې قوماندان، پوهنې آمر او قومي مشرانو یې ملتیا کوله پرانیستل شو.
پوهنې رئیس د پرانېستې پر مهال د یاد ښوونځي په پرانېسته خوښي څرګنده کړه او زیاته یې کړه: له نیکمرغه موږ له ډیرو هڅو وروسته وکړای شول چې په پکتیا ولایت کې د سواد زده کړې دوه دایمي ښوونځي، یو د یاد ولایت په مرکز ګردیز، او بل یې په څمکنیو ولسوالۍ کې پرانیزو.
پوهنې رئیس وویل: له دې نه مخکې موږ د سواد زده کړې په برخه کې د لنډو کلونو لپاره زده کړییز پروګرامونه لرل، خو له دې وروسته به په دایمي ډول موږ د سواد زده کړې بهیر پر مخ بیایو او زموږ هڅه به دا وي، چې د سواد زده کړې لپاره په ټوله پکتیا کې دایمي چوپړتیاووې وړاندې کړو.
د سواد زده کړې د یاد ښوونځي د پرانېستې پر مهال د یادې ولسوالۍ ولسوال، قومي مشرانو او ځوانانو هم خوښي و ښوده او په دې برخه کې یې د پوهنې ریاست هڅې وستایلې.
د سیمې مشرانو، ځوانانو او روحانیونو د یاد ښوونځي را منځته کول د ناپوهۍ او بې سوادۍ پر مخ درنه څپړه و ګڼله او ژمنه یې وکړه چې په دې برخه کې به د پوهنې ریاست سره ګډ کار او هراخیزه مرسته کوي.
