د پوهنې وزارت پلاوي په پاکستان کې مېشت افغان سفیر سره وکتل
د پوهنې وزارت پلاوي مولوي عبدالوارث جبیر په داسې حال کې، چې د پاکستان اسلامي جمهوریت په پېښور ښار کې د پوهنې وزارت آتشه مولوي نورالله نعمان عتیق یې ملتیا کوله، په اسلام آباد کې مېشت له افغان سفیر سردار احمد شکیب سره وکتل.
په یاده کتنه کې ورغلي پلاوي افغان سفیر ته د خپل سفر په اړه معلومات وړاندې کړل او په هغه هېواد کې یې د مېشتو افغان کډوالو ماشومانو د پوهنیز وضعیت او د هغوی د تعلیمي ستونزو په اړه تفصیلي خبرې وکړې.
دغه راز یاد پلاوي د پاکستان په اسلام آباد او راولپنډۍ ښارونو کې د مېشتو افغان کډوالو د عالي لېسو له مديرانو او مسئولينو سره هم له نیږدې وکتل.
په دې کتنه کې دواړو لورو خپلې ښوونیزې او روزنیزې ستونزې مطرح او د حل په لارو چارو یې خبرې وکړې.
