د پوهنې وزارت محترم سرپرست د پکتیکا ولایت برمل ولسوالۍ ته لاړ
د پوهنې وزارت سرپرست محترم الحاج مولوي حبیب الله آغا او ورسره مل پلاوي، د پکتیکا ولایت پوهنې رئیس او چارواکو په ملتیا، د یاد ولایت برمل ولسوالۍ ته رسمي سفر وکړ او هلته یې د پوهنې او سیمه ییزو ادارو د نورو چارواکو سره د لیدنې او د هغوی د نظرونو او ستونزو آورېدلو ترڅنګ، د تعلیمي پروژو څخه هم لیدنه ترسره او د مسئولینو پام یې د یادو پروژو د ساختماني او بیارغونې کارونو کیفیت ته واړاوه.
د پوهنې وزارت محترم سرپرست د برمل ولسوالۍ پوهنې آمریت له چارواکو سره د غونډې پرمهال، په ټولنه کې د تعلیم ارزښت او اهمیت ته په اشارې سره وویل: زموږ اساسي موخه په ملي کچه د ښوونیز او رزونیز بهیر لاپیاوړتیا ده او د همدغه وزارت په رهبرۍ د تعلیمي مرکزونو جوړولو او بیارغونې لپاره هڅې دوام لري.
همدارنګه نوموړي له سیمه ییزو چارواکو څخه وغوښتل چې د ښوونیزو ادارو سره د سالم تعلیمي چاپېریال په رامنځته کولو کې هراړخیزه همکاري وکړي.
