د پوهنې وزارت سرپرست د ولایتونو پوهنې ریاستونو، د ښوونې او روزنې له آمرينو سره وکتل.
د پوهنې وزارت سرپرست الحاج مولوي حبیب الله آغا په ټول هېواد کې د پوهنې کیفیت او زده کوونکو د علمي کچې د لوړولو او د ښوونځیو ښوونې او روزنې پروګرامونو او پلانونو تطبیق په موخه، د ولايتونو پوهنې ریاستونو ښوونې او روزنې له آمرينو سره په خپل کاري دفتر کې وکتل.
غونډه د قرآن مجید د څو مبارکو آیاتونو په تلاوت سره پیل شوه.
ورپسې د پوهنې وزارت سرپرست، وزارت مقام ته د ښوونې او روزنې دآمرينو راتګ ته ښه راغلاست ووایه او ګډون والو ته يې په هېواد کې د پوهنې بهیر د کیفیت او کمیت د ښه والي په موخه، د وزارت پلانونه او پروګرامونه تشرېح کړل.
نوموړي څرګنده کړه، چې پوهنې وزارت د ټولو افغانانو ګډ ښوونيز کور دی او په دې برخه کې د هېواد ټولو بچيانو لپاره د متوازنې ښوونې او روزنې زمينه برابرول يې له کاري لومړیتوبونو څخه وبلل.
د غونډې په دوام کې نوموړي له ګډونوالو او مسئولینو څخه وغوښتل، چې د رغنده وړاندیزونو تر څنګ، د خپلو اړوندو ریاستونو د پوهنیزو ننګونو په اړه معلومات وړاندې کړي.
په دې کتنه کې د نورو په استازيتوب، د کابل ښار د ښوونې او روزنې آمر مولوي عبدالوکيل الهام، په مرکز او ولايتونو کې د پوهنې په برخه کې مشرتابه ته، د ښوونکو د بستونو کمښت او د ښوونځيو لپاره د ودانيو کموالی له عامو ستونزو څخه ياد کړل.
د پوهنې وزارت سرپرست، د شته ستونزو او ننګونو له اورېدو وروسته، د پوهنې وزارت رهبري ژمنه وبلله، چې د شته ستونزو په هواري کې به د ولایتونو او کابل ښار د پوهنې له ټولو ریاستونو سره هر څومره چې ممکنه وي همکاري او خپلې هڅې وکړي.
په پای کې ياده غونډه، د ګډون والو ترمنځ د ستونزو او پرمختګونو په اړه له هراړخیز بحث وروسته، د یو لړ مهمو تصمیمونو په نیولو د دعایې په لوستلو سره پای ته ورسېده
