د پوهنې وزارت د ښوونې او روزنې محترم معین د مسلکي پراختیا علمي غړو له سیمینار څخه ارزونه وکړه
د پوهنې وزارت د ښوونې او روزنې معین محترم شیخ عبدالمالک حقاني، د ښوونکو د روزنې او مسلکي پراختیا د رئیس محترم مولوي محمد ابراهیم عمري په ملتیا، د نورستان، ننګرهار، بلخ او نورو ولایتونو د ښوونکو د مسلکي پراختیا د ۸۵ تنو غړو لپاره د مسلکي وړتیا لوړولو له درې ورځني سیمینار څخه لیدنه او څارنه وکړه.
د پوهنې وزارت معین، د سیمینار څخه د لیدنې پر مهال، د سیمینار ګډون والو ته وینا وکړه او ویې ویل: اړینه ده چې له دغه پروګرام څخه اعظمي ګټه پورته کړئ او په خپلو کاري دندو کې یې پلي کړئ. بې له شکه، په داسې علمي پروګرامونو کې ګډون به د ښوونکو مسلکي او اساسي ستونزې حل او د زده کوونکو د پوهې په کچه کې به مثبت بدلونونه راشي.
بل پلو په سیمینار کې ګډون کوونکو علمي غړو د پوهنې وزارت له پلاوي څخه مننه څرګنده او د هېواد په نورو ولایتونو کې یې هم د ورته سیمینارونو د دوام غوښتنه وکړه.
د یادونې وړ ده چې سیمینار په پورته ذکر شویو ولایتونو کې روان دی او تمه کېږي چې له ۲۱۰۰ تنو څخه ډېر ښوونکي به ترې ګټه پورته کړي.
