د پوهنې وزارت د ښوونیز نصاب او د ښوونکو د مسلکي پراختیا لوی رئیس کندوز ولایت ته ورسېد
د پوهنې وزارت د ښوونیز نصاب او د ښوونکو د مسلکي پراختیا لوی رئیس الحاج مولوي اول ګل ایوبي او ورسره مل پلاوی، د ولایتونو له پوهنې ریاستونو څخه د خپلو رسمي لیدنو په ترڅ کې کندوز ولایت ته لاړ.
په پيل کې د پوهنې وزارت د ښوونیز نصاب او د ښوونکو د مسلکي پراختیا لوی رئیس د کندوز ولایت له پوهنې رئیس او مشرتابه سره وکتل او د دغه ولایت د پوهنیز وضعیت او ښوونیزو کړنو د تنظیم په اړه یې تفصیلي خبرې وکړې.
یاد پلاوي د هغه سيمينار څخه کوم چې د دغه ولايت د ښوونځيو د ٢٤٣ تنو ښوونکو د وړتیا لوړلو لپاره په لاره اچول شوى ؤ، هم څارنه وکړه او ټينګار يې وکړ، چې د پوهنې وزارت د ښوونیز نصاب او د ښوونکو د مسلکي پراختیا لوی ریاست په پام کې لري، تر څو د نویو ښوونکو او اړوندو کسانو لپاره د وړتیا لوړولو سیمینارونه برابر کړي.
ورپسې د کندوز ولایت پوهنې رئیس د پوهنې وزارت د پلاوي له ورتګ هرکلی وکړ او زیاته یې کړه، چې د یاد ولایت د پوهنې د پراختیا او پرمختګ لپاره به نه ستړې کېدونکې هلې ځلې وکړي او د ښوونځیو د ښوونکو لپاره د سیمینارونو جوړولو په برخه کې به له هر راز هلو ځلو څخه درېغ ونه کړي.
