د پوهنې وزارت د ودانیو او ملکیتونو د ساتنې او مراقبت رئیس کاپیسا ولایت ته رسمي سفر وکړ
د پوهنې وزارت د ودانیو او ملکيتونو د ساتنې او مراقبت د رئیس مولوي سمیع الحق حماس په مشرۍپلاوی د یو لړ رسمي چارو ترسره کولو په موخه، کاپیسا ولایت ته ورسېد.
په پیل کې نوموړي د دغه ولایت له پوهنې رئیس مولوي محمد فرید حقاني او آمرینو سره په کتنه کې د تعلیمي وضعیت په تړاو مفصل بحثونه وکړل.
د پوهنې وزارت پلاوي یاد ولایت ته د خپل سفر موخه، د ۱۴۰۳ ښوونیز کال اړوند د پوهنې بودیجې د مصرف ارزونه، د تدارکاتي پروژو، د پاتې اسنادو او حوالو، د مدارسو د نویو لارښودونو برابرول، د ښوونکو د تدریسي ساعتونو تنظیمول، د ښوونکو د پورونو د صندوق پرانیستل، د کار او املاکو په برخه کې د بیارغونې او ساختماني پروژو وضعیت له نږدې څېړل وبلل او د پوهنې پروژو په پلي کولو کې یې د بودیجې په لګښت کې پر روڼتیا ټینګار وکړ.
له بلې خوا د کاپیسا پوهنې رئیس د پوهنې وزارت پلاوي ته د ښه راغلاست پرمهال، د تدارکاتي پروسو او پروژو پلي کولو په بهیر کې د بشپړې روڼتیا ډاډ ورکړ.
