د پوهنې وزارت د نن ورځې مهمو کړنو ته لنډه کتنه
۱- د یوې خیریه ادارې له لوري د یوه نېک اقدام په ترڅ کې، د بادغیس ولایت په مرکز کې د کوچیانو ښوونځي له ۲۴۰ زدهکوونکو سره د قرطاسیې او درسي توکو مرسته وشوه.
۲- د پوهنې وزارت د ساینس او ښوونیزې ټکنالوژۍ مرکز ریاست د ۱۴۰۵ ښوونیز کال د عملیاتي پلان او خپلو اساسي دندو له مخې، چې اساسي موخه يې په ښوونیزو مرکزونو کې د ساینس او ریاضیاتو د عملي زدهکړو د وضعیت ارزونه، د موجودو امکاناتو څخه د اغېزمنې ګټې اخیستنې لپاره ملاتړ او اړینې لارښوونې وړاندې کول دي، د پنجشېر، غزني، سمنګان، پروان او بامیان ولایتونو له یو شمېر ښوونیزو مرکزونو او د ساینس له مدیریتونو څخه حمایوي څارنه ترسره کړه.
۳- د پوهنې وزارت د دارالعلومونو ریاست له لوري د قدرمنو طلابو د علمي وړتيا لوړونې په موخه، په صرف او نحوې مضمونونو کې رقابتي ازموینه د لوګر، غزني، بامیان او پنجشېر ولایتونو کې واخیستل شوه.
۴- د بدخشان ولایت جرم ولسوالۍ د سینه کلي د منځني ښوونځي د نوې ودانۍ بنسټ ډبره د پوهنې مسوولینو، سیمهییزو چارواکو، ښوونکو، د سیمې د خلکو او ځوانانو په حضور کې کېښودل شوه.
۵- د پکتیکا ولایت مټاخان ولسوالۍ اړوند التقوا لېسې د نوې ودانۍ جوړولو چارې د پوهنې مسوولینو او د سیمې د خلکو په حضور کې پیل شوې.
۶- د سرپل ولایت علم پروره خلکو، د ښوونیزو بنسټونو د ملاتړ شوراګانو په همکارۍ، شاوخوا ۸ جریبه ځمکه د دیني مدارسو، ښوونځیو او نورو ښوونیزو مرکزونو جوړولو او پراختیا لپاره وقف کړې ده.
۷- د هلمند ولایت پوهنې ریاست له لوري په ښوونځیو کې ۱۱۷۳ پایې زاړه مېزونه او څوکۍ ترمیم او بېرته ګټې اخیستنې ته چمتو شوې.
۸- د غزني ولایت د جاغوري ولسوالۍ «داوود زیرک» ښوونځي د نوې ودانۍ جوړولو چارې ۹۰ سلنه بشپړې او د پاتې کارونو له بشپړېدو وروسته به ډېر ژر ګټې اخیستنې ته وسپارل شي.
۹- د بلخ ولایت د شورتپې ولسوالۍ پوهنې آمریت د نوې ودانۍ جوړولو چارې د سیمې د خلکو په ۱ میلیون او ۵۰۰ زره افغانیو مالي مرسته روانې دي.
۱۰- د کابل ولایت د قرهباغ ولسوالۍ ښوونیزو ادارو آمرینو او مدیرانو ته د پاکو اوبو، نظافت او روغتیا ساتنې په اړه ښوونیز او پوهاوی ورکونکی سیمینار جوړ شو.
۱۱- د سرپل ولایت په مرکز کې د «شهید داملا عبدالرحمن» دارالحفاظ د ترمیم پروژه د پوهنې وزارت له بودیجې څخه د ۱ میلیونه، ۵۴۱ زره او ۳۷۵ افغانیو په لګښت پیل شوه.
