د پوهنې وزارت د دعوت او ارشاد محترم رئیس د غور ولایت له پوهنې مسئولینو او کارکوونکو سره وکتل

د پوهنې وزارت د دعوت او ارشاد رئیس محترم الحاج مولوي جمعه خان سروري غور ولایت ته د خپل رسمي سفر په ترڅ کې، د همدغه ولایت د پوهنې له رهبرۍ، کارکوونکو او د تعلیمي مرکزونو له مسئولینو سره وکتل.
د پوهنې وزارت د دعوت او ارشاد محترم رئیس د فیروزکوه ښار د ښوونځیو له مسئولینو سره د خبرو پر مهال د ښوونکو د ښوونې او روزنې په برخه کې هڅې وستایلې او ټینګار یې وکړ چې د اسلامي ا.مارت د عالیقدر رهبر ټولې لارښوونې او فرامین، د پوهنې وزارت قوانین او د «امر بالمعروف او نهی عن المنکر» قانون په ټولو تعلیمي ادارو کې باید په بشپړه توګه مراعات او عملي شي.
ورپسې، د غور ولایت پوهنې ریاست مسئولینو د پوهنې وزارت د پلاوي له سفر څخه د مننې ترڅنګ ډاډ ورکړ، چې یاد قوانین او فرامین به په دې ولایت کې د پوهنې ریاست تر چتر لاندې په بشپړ ډول تطبیق او رعایت شي.