د پوهنې وزارت د دعوت او ارشاد ریاست پلاوی ننګرهار ولایت ته په رسمي سفر لاړ

د پوهنې وزارت د دعوت او ارشاد ریاست محترم مرستیال مولوي بسم‌الله حسان، ننګرهار ولایت ته د خپل رسمي سفر په ترڅ کې، د یاد ولایت له پوهنې رئیس محترم شیخ محمد شریف حلیمي او اړوندو منسوبینو سره د خپل سفر د موخو او همغږۍ په تړاو ګډه غونډه وکړه.
د یاد ولایت پوهنې رئیس د پلاوي هرکلی وکړ او ډاډ یې ورکړ چې د دعوت او ارشاد ریاست ټولې لارښوونې به د پوهنې په ریاست کې پلي شي.
 نوموړي ټولو مسئولینو ته سپارښتنه وکړه چې د دعوت او ارشاد په مجلسونو کې منظم ګډون ولري، خپلو دندو او مسئولیتونو ته جدي پاملرنه وکړي او د مراجعینو چارې په ښه او چټک ډول ترسره کړي. 
دغه راز د پوهنې محترم رئیس له یاد پلاوي څخه وغوښتل چې د دعوت او ارشاد څانګې لپاره باید ځانګړي تشکیلات رامنځته کړي.
ورپسې د پوهنې وزارت د دعوت او ارشاد ریاست محترم مرستیال په خپلو خبرو کې وویل: د صحابه کرامو «رضی‌الله عنهم» د بریا راز دا و، چې هغوی د الله تعالی په کتاب ته په بشپړ ډول عمل کاوه او د رسول الله ﷺ سنت او طریقه یې په خپل ژوند کې عملي کړې وه. موږ او تاسو چې مسلمانان یو، لازمه ده چې د رسول الله ﷺ لاره او روش لا زیات په خپل ژوند کې عملي کړو.
غونډه په مبارکې دعائیې سره پای ته ورسېده.