د پوهنې وزارت د دعوت او ارشاد رئیس د سرپل ولایت د پوهنې له رئیس او مسئولینو سره وکتل
د پوهنې وزارت د دعوت او ارشاد رئیس مولوي جمعه خان سروري سرپل ولایت ته د خپل رسمي سفر په ترڅ کې، د یاد ولایت له پوهنې رئیس مولوي محمد رحماني، د کلیدي څانګو آمرینو، د سید آباد او صیاد ولسوالیو د پوهنې له مسئولینو سره وکتل.
د پوهنې وزارت د دعوت او ارشاد رئيس دغه ولايت ته د خپل سفر موخه له علماءکرامو او د پوهنې له مسئولينو سره کتنه او د دعوت او ارشاد د نصاب له پلي کېدو څخه څارنه وبلله.
د پوهنې وزارت د دعوت او ارشاد رئيس په اسلامي او اخلاقي اصولو باندې د ټينګار ترڅنګ، له مسئولينو او کارکوونکو څخه وغوښتل، چې خپل سلوک او ويناء د اسلام د ګران پيغمبر حضرت محمد (صلی الله علیه وسلم) له سيرت او سنتو سره برابر کړي، تر څو د زده کونکو په شمول د نورو لپاره یو ښه مثال وي.
له بلې خوا د سرپل ولایت پوهنې مسئولینو د پوهنې وزارت د دعوت او ارشاد ریاست پلاوي ته د ښه راغلاست ترڅنګ، د دعوت او ارشاد د لارښوونو د تطبيق په برخه کې خپل کاري راپور وړاندې کړ او د دعوت او ارشاد ریاست د ټولو کړنلارو د پلي کېدو ډاډ یې ورکړ.
